¡TODA AXUDA SERÁ BENVIDA!

As plantas e froitos silvestres crecen de forma natural e espontánea e achegan ao noso organismo elementos nutritivos de alto valor biolóxico, vitaminas, sales minerais e outras sustancias activas con propiedades beneficiosas, que na súa inmensa maioría, están aínda por descubrir.

Froitos do espiño branco fotografados en setembro

As plantas silvestres teñen máis vitalidade e mellor calidade biolóxica, ademais de posuír unha mellor capacidade de adaptación ao medio que as de cultivo, xa que están mellor adaptadas ás condicións ambientais dos lugares onde crecen.

Nos últimos anos estanse a adaptar ao cultivo a gran escala, e fomentando o consumo de especies vexetais tradicionalmente silvestres, como poden ser o sabugueiro, a eiruga, os canónigos, os berros, etc. Incluso os restaurantes de alta cociña do mundo se votaron ao campo para incluír en todo un abano de pratos creativos as plantas da súa contorna.

Por outra banda, moitos dos nomes cos que coñecemos a estas plantas, en relación aos seus novos usos culinarios non están recollidos no dicionario galego, entón, ¿como as chamamos cando falemos delas?

Froitos do sabugueiro en agosto

Ademais de adquirir coñecementos sobre o nome e usos das plantas que vemos, e de aprender a apreciar a variedade de posibilidades e de sabores que nos brinda a natureza. Levar a cabo este proxecto permitirá ao alumnado participante ver a súa contorna dende un novo punto de vista, e axudaralles a apreciar a enorme diversidade de especies que nos rodean, aprendendo a respectala.

A través das plantas terán a posibilidade de coñecer eses recursos que temos ao alcance da man e que, quitando algunha rara excepción non explotamos, aínda que si o fan en outras rexións ou en outras culturas. Algúns  incluso foron utilizados na nosa rexión noutros tempos, pero o seu uso foi abandonado en favor de plantas de cultivo máis produtivas. Tendo isto en conta, a recompilación de información sobre eses usos aportará riqueza ao coñecemento das materias primas que se utilizan na industria alimentaria.

Por todo isto, e para inaugurar o blog gustaríame, como coordinadora do equipo de dinamización da Lingua Galega do CIFP Coroso, animar a todo aquel que queira que nos comente a súas experiencias relacionadas co tema das plantas silvestres utilizadas en alimentación, (ou se non tes ningunha experiencia cóntanolo tamén).

Porque o noso proxecto de innovación en dinamización lingüística comeza precisamente por aí, xa que os alumnos, na primeira parte do proxecto, terán que recoller información na súa contorna máis próxima, acerca dos usos que historicamente se lle deron ás plantas silvestres na alimentación, na nosa comarca.